As Ánimas, os mouros e os misterios milenarios dos Ancares

• Dificultade: Baixa
• Duración: 4 horas
• Lonxitude: 12 Km
• Guía: Xabier Moure, presidente de Patrimonio dos Ancares
• Data: 7 de outubro de 2018

A saída será dende a vila de Becerreá. O primeiro punto será a Cova dos Mouros, con  lendas de mouros e refuxio de fuxidos. Tamén pasaremos polo Castro de Vilar de Ousón e Chao da Capilla , colleremos por unha antiga caleira e iremos á Igrexa de Cruzul, moi popular na zona porque o seu campanario foi utilizado nas alarmas populares durante a Guerra da Independencia. Cruzaremos a Ponte de Cruzul que foi unha das infraestruturas máis cara do Camiño Real por Galicia. Alí pararemos a contar historias da Guerra da Independencia.

Durante o roteiro tamén pasaremos pola Igrexa románica de Ouselle, moi coñecida na zona pola tradición da antiga festa das Ánimas do Purgatorio. Tamén visitaremos o Monolito a Fuco Gómez, que foi un arredista galego en Cuba e pasaremos por un tramo da vía romana XIX; o coñecido como Camín da Antiga.

A andaina tamén percorrerá o Castro de Ouselle, identificado, erroneamente, coa capital dos Zoelas e, ali, Moure, explicará o segredo dese erro. Outros puntos a visitar serán a Igrexa do Ecce-Homo que foi un antigo mosteiro e na que hai tradicións e rituais arredor do Santo, o Castro de Saa, que foi o relevo romano de Vilarín, o Fito no cemiterio de Becerreá, que é o único elemento dunha desaparecida igrexa románica e, finalmente, a Fonte do Inferno, que está asociada a asasinatos durante a Guerra Civil.

O final da ruta será, de novo, en Becerrá. Se hai tempo explicaranse algunhas cousas curiosas da capital municipal da comarca.

Punto de encontro