Esta é unha Edición especial de catro roteiros en colaboración cos concellos de Outes, A Mezquita, Tui e Castro de Rei. Nestes roteiros tamén participarán como guías os respectivos alcaldes . Unha edición especial previa á convocatoria anual de Rutas de Historia de 2023
Para facer a inscrición é preciso facer un pago de 5€ por persoa para cada roteiro en concepto de seguro de accidentes e gastos de xestión e organizción.
Non se devolverá importe ningún, por iso que recomendamos que as inscricións se fagan con plena consciencia de que poderán acudir.
As persoas que estean interesadas en buscar aloxamentos na zona onde se realicen os roteiros, podemos suxerirlle algúns dos que nos recomenden as propias asociacións da zona.
Para calquera destas cuestións poden escribirnos a:
Nesta xeira percorremos un senlleiro solar galaico. Será un percorrido que comeza contextualizado nun dos escenarios do que a a propia Unión Europea definiu nos anos 90, como a primeira “ idade de ouro” do vello continente: A idade do bronce. Pódese afirmar que mil anos antes de que Roma construíse, nesta zona, a Ponte Bibei, a Ponte Navea ou a da Cigarrosa, sobre a antiga traza deste camiño, esta bisbarra enteira era xa un territorio aberto ó resto do continente.
A través da inmensa fraga autóctona de rebolos, – o nemetum sacro do que avisara Ptolomeo – baixo a sombra amante de milleiros de castiñeiros con valor monumental, subiremos até as penas que inda exhiben a súa importancia ritual e baixaremos ó encontro do lugar onde os camiños de vivos e mortos se atopan.
O Camiño do Ribón, é un escenario ateigado de contidos e fitos dentro dunha paisaxe privilexiada que foi declarada primeira paisaxe protexida de Galicia. Estas beiras do Río Navea, onde inda ten presenza esta deusa galaica, gardan inda a memoria do paso das lexións; dos exércitos dos reis suevos ou das tropas napoleónicas. Lendas de tesouros agachados, seres míticos e episodios de licantropía, a peripecia decimonónica dun gran artista de fama continental. Feitos históricos da cara oculta da historiografía nun percorrido por unha “topografía cualitativa” ( Hernández Pacheco, E. 1952) entendida como eses espazos xeográficos con propiedades significantes que emanan da existencia dun sistema simbólico ben desenvolvido.
info@rutasdehistoria.com