Lugo romano

• Data: Sábado 4 de maio 2019
• Saída ás 10:00 horas
• Duración aprox. 4 horas
• Grupo máximo 60 persoas
• Itinerario: volta completa á muralla romana (2.200 metros), Praza Maior (antigo foro romano), monumento aos fundadores de Lucus Augusti, piscina romana na Praza de Santa María, mosaico romano e aras votivas no Museo Provincial e Praza de Santo Domingo (monumento ao Bimilenario de Lucus Augusti).
• Guía  Lidia de la Fuente, Guía Oficial de Turismo de Galicia e impulsora do proxecto Camiños con Arte.

No século I a.C., durante as guerras cántabras, entre os anos 25 e 19 a.C. o Imperio Romano estableceu un campamento militar nun cumio á beira do río Miño, un emprazamento estratéxico que lles permitía continuar a súa conquista do noroeste, o territorio que co tempo se convertiría na provincia da Gallaecia. Ese campamento militar considérase a orixe da cidade de Lucus Augusti, fundada entre os anos 15 e 13 a.C. por Paulo Fabio Máximo, legado do emperador César Augusto.

Na nosa ruta por Lucus Augusti, a cidade máis antiga de Galicia, seguiremos as pegadas dos soldados percorrendo toda a muralla romana, declarada Patrimonio da Humanidade, única muralla romana no mundo que conserva íntegro todo o seu perímetro, de aproximadamente 2.200 metros.

A Porta Miñá, a Porta de Santiago, as escaleiras interiores da muralla e a torre da Mosqueira, coas súas ventás orixinais dispostas para vixiar a millas de distancia, levarannos de volta á época romana durante o noso percorrido.

Visitaremos tamén vestixios arqueolóxicos musealizados in situ, como a piscina romana situada na Praza de Santa María, ao lado da Catedral e no Camiño Primitivo a Santiago de Compostela.

O emprazamento do foro, das domus máis luxosas decoradas con mosaicos, das necrópoles, dos fornos cerámicos e mailo acueducto permitirannos darlle forma á capital romana do convento xurídico lucense que pervive baixo os nosos pés.

Punto de encontro