Ferrol rebelde: Un paseo por 100 anos de historia obreira

• Data: Domingo 15 de setembro de 2019
• Dificultade: baixa
• Tipoloxía: Combinado (xeira a pé + roteiro marítimo)
• Duración aproximada: 4 horas
• Lonxitude: 5 Km + ruta en barco
• Guía: Marcos Abalde, Asociación Cultural Roxín Roxal
• Grupo máximo: 100 persoas
• Punto de encontro: Palco da música do Cantón
• Hora de saída: 10:00h

NOTA . O prezo deste roteiro é de 6€ e inclúe unha ruta marítima como parte do percorrido final, polo que neste caso non se cobra fianza e como tal non haberá devolución xa que o importe cobrado é exclusivamente de gastos.

Ferrol ten o dereito a saber e o deber de recordar a longa estirpe de rebeldes que converteu o movemento obreiro ferrolán na punta de lanza do movemento obreiro galego. Este roteiro procura divulgar a historia heroica do pobo traballador e situar este movemento social no lugar central que lle corresponde na conquista dos dereitos democráticos. O Ferrol rebelde é, sobre todo, o Ferrol solidario, o Ferrol de homes e mulleres que se senten irmáns e camiñan xuntos pola liberdade.

Ferrol rebelde percorre os lugares máis significativos de cen anos de loita obreira. Dunha maneira amena procura aproximarse ao perfil humano dos seus protagonistas, aos documentos que produciron e aos ideais que os mobilizaron. O roteiro comeza en 1871 coa publicación en Ferrol do primeiro xornal obreiro de Galiza “El trabajo” e finaliza en1975 co asasinato de Moncho Reboiras.

Ferrol rebelde está dividido en dez paradas que marcan grandes fitos da historia de Galiza:

1. A bandeira vermella do brigadier Pozas
2. Pedrosa, precursor do socialismo galego
3. Proletarias, fame de xustiza
4. Congreso obreiro internacional para deter a Primeira Guerra Mundial
5. Centro Obreiro de Cultura, a maior biblioteca de Ferrol
6. Un vestixio do Ferrol republicano
7. Praza Pablo Iglesias nº4, centro neurálxico do socialismo
8. Derrotados. Non sometidos.
9. A porta da memoria
10. Moncho Reboiras, semente de vencer

Tras o roteiro polas rúas de Ferrol, haberá outro roteiro polo mar para coñecer outros lugares imprescindibles deste Ferrol rebelde desde as augas da ría.

Punto de encontro